|| श्री हनुमान चालीसा ||

दोहा
श्रीगुरु चरन सरोज रज, निजमन मुकुरु सुधारि। बरनउं रघुबर बिमल जसु, जो दायक फल चारि।।
बुद्धिहीन तनु जानिके, सुमिरौं पवन-कुमार। बल बुधि बिद्या देहु मोहिं, हरहु कलेस बिकार।।
चौपाई
जय हनुमान ज्ञान गुन सागर। जय कपीस तिहुं लोक उजागर।।
राम दूत अतुलित बल धामा। अंजनि-पुत्र पवनसुत नामा।।
महाबीर बिक्रम बजरंगी। कुमति निवार सुमति के संगी।।
कंचन बरन बिराज सुबेसा। कानन कुण्डल कुँचित केसा।।
हाथ बज्र औ ध्वजा बिराजे। कांधे मूंज जनेउ साजे।।
शंकर सुवन केसरी नंदन। तेज प्रताप महा जग वंदन।।
बिद्यावान गुनी अति चातुर। राम काज करिबे को आतुर।।
प्रभु चरित्र सुनिबे को रसिया। राम लखन सीता मन बसिया।।
सूक्ष्म रूप धरि सियहिं दिखावा। बिकट रूप धरि लंक जरावा।।
भीम रूप धरि असुर संहारे। रामचन्द्र के काज संवारे।।
लाय सजीवन लखन जियाये। श्री रघुबीर हरषि उर लाये।।
रघुपति कीन्ही बहुत बड़ाई। तुम मम प्रिय भरतहि सम भाई।।
सहस बदन तुम्हरो जस गावैं। अस कहि श्रीपति कण्ठ लगावैं।।
सनकादिक ब्रह्मादि मुनीसा। नारद सारद सहित अहीसा।।
जम कुबेर दिगपाल जहां ते। कबि कोबिद कहि सके कहां ते।।
तुम उपकार सुग्रीवहिं कीन्हा। राम मिलाय राज पद दीन्हा।।
तुम्हरो मंत्र बिभीषन माना। लंकेश्वर भए सब जग जाना।।
जुग सहस्र जोजन पर भानु। लील्यो ताहि मधुर फल जानू।।
प्रभु मुद्रिका मेलि मुख माहीं। जलधि लांघि गये अचरज नाहीं।।
दुर्गम काज जगत के जेते। सुगम अनुग्रह तुम्हरे तेते।।
राम दुआरे तुम रखवारे। होत न आज्ञा बिनु पैसारे।।
सब सुख लहै तुम्हारी सरना। तुम रच्छक काहू को डर ना।।
आपन तेज सम्हारो आपै। तीनों लोक हांक तें कांपै।।
भूत पिसाच निकट नहिं आवै। महाबीर जब नाम सुनावै।।
नासै रोग हरे सब पीरा। जपत निरन्तर हनुमत बीरा।।
संकट तें हनुमान छुड़ावै। मन क्रम बचन ध्यान जो लावै।।
सब पर राम तपस्वी राजा। तिन के काज सकल तुम साजा।।
और मनोरथ जो कोई लावै। सोई अमित जीवन फल पावै।।
चारों जुग परताप तुम्हारा। है परसिद्ध जगत उजियारा।।
साधु संत के तुम रखवारे।। असुर निकन्दन राम दुलारे।।
अष्टसिद्धि नौ निधि के दाता। अस बर दीन जानकी माता।।
राम रसायन तुम्हरे पासा। सदा रहो रघुपति के दासा।।
तुह्मरे भजन राम को पावै। जनम जनम के दुख बिसरावै।।
अंत काल रघुबर पुर जाई। जहां जन्म हरिभक्त कहाई।।
और देवता चित्त न धरई। हनुमत सेइ सर्ब सुख करई।।
सङ्कट कटै मिटै सब पीरा। जो सुमिरै हनुमत बलबीरा।।
जय जय जय हनुमान गोसाईं। कृपा करहु गुरुदेव की नाईं।।
जो सत बार पाठ कर कोई। छूटहि बन्दि महा सुख होई।।
जो यह पढ़ै हनुमान चालीसा। होय सिद्धि साखी गौरीसा।।
तुलसीदास सदा हरि चेरा। कीजै नाथ हृदय महं डेरा।।

दोहा
पवनतनय संकट हरन, मंगल मूरति रूप।
राम लखन सीता सहित, हृदय बसहु सुर भूप।।

Doha (Opening Verse)

Shri Guru Charan Saroj Raj, Nijman Mukur Sudhari.
Barnaun Raghubar Bimal Jasu, Jo Dayak Phal Chari.

Buddhiheen Tanu Janike, Sumirau Pawan Kumar.
Bal Buddhi Vidya Dehu Mohi, Harahu Kalesh Vikaar.

Chaupai (Main Verses)

Jai Hanuman Gyan Gun Sagar, Jai Kapis Tihun Lok Ujagar.
Ram Doot Atulit Bal Dhama, Anjani Putra Pavan Sut Nama.

Mahabir Bikram Bajrangi, Kumati Nivar Sumati Ke Sangi.
Kanchan Baran Biraj Subesa, Kanan Kundal Kunchit Kesa.

Hath Bajra Aur Dhwaja Biraje, Kandhe Moonj Janeu Sajai.
Shankar Suvan Kesari Nandan, Tej Pratap Maha Jag Vandan.

Vidya Van Guni Ati Chatur, Ram Kaj Karibe Ko Atur.
Prabhu Charitra Sunibe Ko Rasiya, Ram Lakhan Sita Man Basiya.

Sukshm Roop Dhari Siyahi Dikhava, Bikat Roop Dhari Lank Jarava.
Bhim Roop Dhari Asur Sanhare, Ramchandra Ke Kaj Savare.

Laye Sanjivan Lakhan Jiyaye, Shri Raghubeer Harashi Ur Laye.
Raghupati Keenhi Bahut Badai, Tum Mamma Priya Bharat Hi Sam Bhai.

Sahas Badan Tumharo Jas Gaave, As Kahi Shripati Kanth Lagaave.
Sankadik Brahmadi Muneesa, Narad Sarad Sahit Aheesa.

Yam Kuber Digpal Jahaan Te, Kavi Kovid Kahi Sake Kahaan Te.
Tum Upkar Sugreevahin Keenha, Ram Milaye Rajpad Deenha.

Tumharo Mantra Vibheeshan Maana, Lankeshwar Bhaye Sab Jag Jana.
Yug Sahasra Yojan Par Bhaanu, Leelyo Taahi Madhur Phal Jaanu.

Prabhu Mudrika Meli Mukh Mahi, Jaladhi Langhi Gaye Acharaj Nahi.
Durgam Kaj Jagat Ke Jete, Sugam Anugrah Tumhare Tete.

Ram Dware Tum Rakhvare, Hoat Na Aagya Bin Paisare.
Sab Sukh Lahai Tumhari Sarna, Tum Rakshak Kahu Ko Darna.

Aapan Tej Samharo Aape, Teenon Lok Hank Te Kanpe.
Bhoot Pishach Nikat Nahi Aave, Mahabir Jab Naam Sunave.

Nase Rog Harai Sab Peera, Japat Nirantar Hanumat Beera.
Sankat Te Hanuman Chhudave, Man Kram Vachan Dhyan Jo Lave.

Sab Par Ram Tapasvi Raja, Tin Ke Kaj Sakal Tum Saja.
Aur Manorath Jo Koi Lave, Soi Amit Jeevan Phal Pave.

Charon Yug Par Tap Tumhara, Hai Parsiddha Jagat Ujiara.
Sadhu Sant Ke Tum Rakhware, Asur Nikandan Ram Dulare.

Ashta Siddhi Nav Nidhi Ke Data, As Bar Din Janki Mata.
Ram Rasayan Tumhare Pasa, Sada Raho Raghupati Ke Dasa.

Tumhare Bhajan Ram Ko Pave, Janam Janam Ke Dukh Bisrave.
Anta Kaal Raghubar Pur Jayi, Jahan Janma Hari Bhakta Kahayi.

Aur Devata Chitt Na Dharayi, Hanumat Se Hi Sarva Sukh Karayi.
Sankat Kate Mite Sab Peera, Jo Sumire Hanumat Balbeera.

Jai Jai Jai Hanuman Gosai, Kripa Karahu Guru Dev Ki Nai.
Jo Sat Baar Path Kar Koi, Chutahi Bandi Maha Sukh Hoi.

Jo Yah Padhe Hanuman Chalisa, Hoy Siddhi Saakhi Gaurisa.
Tulsidas Sada Hari Chera, Keejai Nath Hriday Mah Dera.

Doha (Closing Verse)

Pavan Tanay Sankat Haran, Mangal Murti Roop.
Ram Lakhan Sita Sahit, Hriday Basahu Sur Bhoop.